Климатските промени веќе се чувствуваат низ целиот свет, но и кај нас во Северна Македонија. Најновиот извештај на Светската метеоролошка организација (СМО), Состојба на глобалните водни ресурси 2024 година, покажува дека минатата година само една третина од светските речни сливови биле во „нормални“ услови. Остатокот се соочил со екстреми: тешки суши или разорни поплави.

Северна Македонија не е изолирана од овие промени

Последниве години, земјоделците во Пелагонија и Тиквеш страдаат од сушни периоди. Нивите зависат од наводнување, а недостигот на вода ја зголемува цената на производството и ја намалува конкурентноста.

Во Македонија поплавите се дополнително поттикнати од релјефот, бидејќи многу градови и села се сместени токму во области што природно се поплавуваат. Најчесто, најголеми проблеми и штети на инфраструктурата предизвикуваат реките Вардар, Црна Река и Струмица со нивните притоки. Во соседните земји, Србија и Бугарија, поплавите се сè почести и посилни.

Екосистемите на Преспанското и Дојранското Езеро, кои веќе со години се намалуваат, се во криза,а климатските промени дополнително го влошуваат овој тренд.

Во земјава веќе се чувствуваат последиците врз земјоделството, инфраструктурата и секојдневниот живот. Ако не вложиме во управување со водите, ризикот од суши и поплави ќе продолжи да расте. Време е за акција: и државата, и локалните заедници, и граѓаните.